चितवन– बोक्साको आरोपमा इच्छाकामना गाउँपालिका–२ का वडाध्यक्षमाथि शनिबार साँझ स्थानीयवासीको एक समूहले हातपात गरेको छ । सो समूहले उनलाई कुटपिट गरी कालोमोसो मोसो दलेर र जुत्ताको माला लगाइदिएको हो । 

वडाध्यक्ष पञ्चबहादुर प्रजालाई समूहले दिसापिसाब खुवाउने प्रयाससमेत गरेको थियो । वडाको सामान सामुदायिक भवनमा सार्ने विषयमा विवाद हुँदा स्थानीय उत्तरकुमार गुरुङसहितको समूहले वडाध्यक्षलाई सो किसिमको दुव्यवहार गरेको हो ।

उनीहरुले बोक्सा भएको आरोप लगाउँदै दिसा–पिसाब पनि खुवाउन खोजेको पीडित प्रजाले बताएका छन् । घटना भएको वेला आपूसँगै रहेका २–३ जना दाजुभाइमाथि पनि कुटपिट भएको उनले बताए । 

घटनामा संलग्न भएको आरोपमा प्रहरीले उत्तरकुमार गुरुङ र बिर्खबहादुर गुरुङलाई पक्राउ गरेको छ ।