काठमाडौं– उपराष्ट्रपति नन्दबहादुर पुनले १३औँ दक्षिण एसियाली खेलकुद (साग) भव्य रुपमा सम्पन्न भएकामा खुसी व्यक्त गर्दै नेपालका तर्फबाट पदक जित्ने खेलाडीलाई बधाई दिएका छन् । उपराष्ट्रपतिले मंगलबार बधाई सन्देश दिँदै दक्षिण एसिया र विश्व जगत्मा नेपालको शिर उँचो हुने गरी सागको १३औँ संस्करण ऐतिहासिक रुपमा सम्पन्न गरेकामा नेपाल सरकार, युवा तथा खेलकुद मन्त्रालय, राष्ट्रिय खेलकूद परिषद्, सुरक्षा निकाय, कर्मचारी, खेलकुद पदाधिकारी र सम्बद्ध सबैमा धन्यवाद ज्ञापन गरेका हुन् ।
‘मंसिर १५ गते दशरथ रंगशालामा भव्य समारोहबीच औपचारिक समुद्घाटन भएको १३औँ दक्षिण एसियाली खेलकुद (साग) आज पुरुष फुटबलमा भुटानलाई पराजित गर्दै नेपालले स्वर्ण पदक जितेसँगै समापन भएको छ । दक्षिण एसियाको सबैभन्दा ठूलो खेलकुद प्रतियोगिता सागको १३औँ संस्करण भव्य रुपमा सम्पन्न भएकामा अत्यन्त हर्षित छु’, उपराष्ट्रपतिको बधाई सन्देशमा भनिएको छ ।
उनले नेपालका तर्फबाट छनाेट भएर देशको झण्डा फहराउँदै प्रतियोगितामा भाग लिने सम्पूर्ण खेलाडीलाई पनि बधाईसहित धन्यवाद दिएका छन् । उपराष्ट्रपति पुनले १३औँ सागको समापन १४औँ सागको तयारी पनि हो भन्दै पाकिस्तानमा हुने सागको आगामी संस्करणमा नयाँ कीर्तिमानी सफलता हासिल गर्ने लक्ष्यका साथ नेपाल सरकार र सम्बन्धित निकाय तयारीमा जुट्ने तथा सागमा पदक विजेता खेलाडीलाई सरकारले उचित सम्मान गर्ने विश्वास समेत व्यक्त गरेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।