काठमाडौं– लोकसेवा आयोगले बुधबार एक हजार ९६ जना अधिकृतका लागि विज्ञापन खुलाएको छ । यसमध्ये ३ सय २८ जनाको पदपूर्ति बढुवाबाट हुनेछ । 

लोकसेवाले खुलाबाट ४१९ र बाँकी ३४९ जना विभिन्न समावेशी समूहका लागि छुट्याएको छ । प्रशासन, लेखा, राजश्व, परराष्ट्र, न्याय, संसदलगायत सेवाका लागि कुल १ हजार ९६ पदका लागि आवेदन आह्वान गरिएको हो । 

प्रशासन सेवाको सामान्य प्रशासन समूहमा सबैभन्दा बढी ५ सय ६० जना माग गरिएको छ । त्यसमध्ये खुल्लाबाट २ सय १६ र बढुवाबाट १ सय ६८ जनाको पदपूर्ति गरिनेछ । यस्तै उक्त समूहमा समावेशीतर्फ महिलामा ५८, आदिवासी जनजातिमा ४८, मधेसीमा ३९, दलितमा १५, अपांगमा ९ र पिछडिएको क्षेत्रमा ७ जनाको कोटा छुट्याइएको छ ।

राजश्व समूहमा ६९, लेखापरीक्षण समूहमा ४२, लेखा समूहमा ३० जना अधिकृतको माग भएको छ । व्यवस्थापिका संसद सेवातर्फ २८ जना र न्याय सेवातर्फ न्याय समूहमा २ सय ९०, कानुन समूहमा ४९ र सरकारी वकिल समूहमा २४ अधिकृतका लागि विज्ञापन खुलेको छ ।

लोकसेवा आयोगले सबैभन्दा कम परराष्ट्र सेवामा ४ जना माग गरेको छ ।