ज्यान मार्ने उद्योगमा मुद्दा खेपिरहेका वडाध्यक्षसहित नौजना धरौटीमा रिहा भएका छन् । बझाङको खप्तड छान्ना गाउँपालिका–६ का वडाध्यक्ष तिलक खड्कासहित नौ जनालाई जिल्ला अदालतले पाँच लाख ७५ हजार धरौटीमा रिहा गरेका हो ।

रिहा हुनेमा वडाध्यक्ष खड्कासहित ओमजंग खड्का, वसन्त खड्का, जंग खड्का, एकेन्द्र खड्का, सन्तोष खड्का, भरत थापा, दीपक खड्का र किरण खड्का रहेको जिल्ला प्रहरी कार्यालयले जनाएको छ । 

उनीहरूमाथि खप्तड छान्ना गाउँपालिका–६ का ७६ वर्षीय डबलबहादुर खड्का र निर्मला खड्कालाई कुटपिट गरेको आरोप लागेको थियो । कुटपिटबाट उनीहरू सख्त घाइते भएका छन् । डबलको दुवै खुट्टा भाँचिएको उनका छोरा त्रिभुवन खड्काले बताए ।