काठमाडौं– ९ माघमा रिक्त राष्ट्रिय सभा सदस्यको पदका लागि निर्वाचन हुँदैछ । यसका लगि सबै दलहरुले आफ्ना उम्मेदवार घोषणा गरिसकेका छन् ।
सत्तारुढ दल नेपाल कम्युनिस्ट पार्टी (नेकपा)ले राष्ट्रिय सभा उम्मेदवार बनाएका १६ जनामध्ये सबैभन्दा बढी चर्चामा छन्, दलका प्रवक्ता नारायणकाजी श्रेष्ठ ।
श्रेष्ठ गत निर्वाचनमा गोरखामा समाजवादी पार्टीका डा. बाबुराम भट्टराईसँग पराजित भएका थिए । त्यसैले पनि उनको उम्मेदवारीलाई लिएर विभिन्न अड्कलबाजी गरिएका छन् ।
नेकपाभित्रै कतिपयले श्रेष्ठलाई राष्ट्रिय सभामा लैजाने पार्टीको निर्णयप्रति असन्तुष्टि समेत जनाएका छन् । जनताबाट एकपटक पराजित भइसकेका व्यक्तिलाई त्यही समयमा नै सांसद बनाउन खोज्नु नेकपाका लागि घातक हुनसक्ने पनि अनुमान गरिएका छन् । ९ माघमा हुने राष्ट्रिय सभा निर्वाचनकै लागि नेकपाका अध्यक्षद्वय पुष्पकमल दाहाल प्रचण्ड र प्रधानमन्त्री केपी शर्मा ओलीले अर्का नेता वामदेव गौतमलाई पनि प्रस्ताव गरेका थिए ।
तर, गौतमले राष्ट्रिय सभा सदस्य प्रधानमन्त्री हुन पाउने व्यवस्था नभएकाले आफू राष्ट्रिय सभामा नजाने अडान लिए । उनले संविधान संशोधन गर्नु पर्ने प्रस्ताव राखे । उनको यो प्रस्तावलाई नेकपाका अध्यक्षद्वयले अस्वीकार गरिदिए । त्यसपछि गौतमले आफू राष्ट्रिय सभाका लागि उम्मेदवार नहुने निष्कर्षमा नै आफू अडिग रहे ।
अर्कोतिर, नारायणकाजी श्रेष्ठ भने पार्टीले चाहेको खण्डमा आफूले जुनसुकै भूमिका निर्वाह गर्न पनि तयार रहेको भन्दै राष्ट्रिय सभा सदस्य बन्ने पक्षमा देखिए । उनले आइतबार दिउँसो पोखरा पुगेर आफ्नो उम्मेदवारी दर्ता पनि गरेका छन् ।
प्रतिनिधि सभाको निर्वाचनमा पराजित भएका नारायणकाजी श्रेष्ठ आखिर किन राष्ट्रिय सभामा आउन चाहे ?
यसबारे अहिले नेकपा नेताभित्र पनि प्रश्न उठेका छन् ।
आफू राष्ट्रिय सभाको उम्मेदवार बन्ने विषयमा जानकारी दिने समयमा नै नारायणकाजी श्रेष्ठले चाहिँ यसलाई पार्टीको चाहनाका रुपमा व्याख्या गरेका थिए ।
‘पार्टीले चाहेको हो,’ उनले यसबारे भन्ने गरेका छन्, ‘पार्टीले चाहेको भूमिका निर्वाह गर्न म सधैं नै तयार छु ।’
तर, नेकपका एक केन्द्रीय सदस्यलाई चाहिँ यसमा पार्टीको चाहनाभन्दा पनि बढी प्रचण्डको चाहना भएको हुनसक्ने लाग्छ । ‘खासमा प्रचण्ड कमरेडले आफूलाई सहज होस् भन्नका लागि उहाँलाई अगाडि सार्नु भएको हो,’ उनले भने, ‘उहाँ राष्ट्रिय सभा सदस्य भएपछि मन्त्रिपरिषद्मा पनि लगिने अहिले नै कन्फर्म मानौँ न ।’
मन्त्रिपरिषद्मा रहेका नेकपा नेता गृहमन्त्री रामबहादुर थापा बादलसँग पछिल्लो समय नेकपा अध्यक्ष पुष्पकमल दाहाल प्रचण्डको त्यति राम्रो सम्बन्ध नभएको र उनलाई ‘काउन्टर’ दिन श्रेष्ठलाई अगाडि सारेको ती नेताले बताए ।
‘नेताले चाहने चेक एन्ड ब्यालेन्स हो,’ उनले भने, ‘जब अध्यक्ष प्रचण्डलाई बादलले आफूसँग दूरी बनाएको महसुुस भइरहेको छ, उहाँले नारायणकाजी श्रेष्ठलाई अगाडि सार्नु स्वभाविक नै हो ।’
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।