काठमाडौं– गायिका आस्था राउतलाई ४ दिन हिरासतमा राख्न प्रहरीले अनुमति पाएको छ । 

गायन प्रस्तुतिका लागि सिक्किम जाने क्रममा त्रिभुवन विमानस्थलमा सुरक्षाकर्मीसँग विवाद भएपछि उनले त्यसको विरोधमा बोल्दै गरेको भिडियो फेसबुकमा पोस्ट गरेकी थिइन् । उनको सो भिडियो भइरल भएपछि त्यसमा सकारात्मक तथा नकारात्मक विभिन्न प्रतिक्रिया आइरहेका छन् । 

भिडियोमा प्रहरीविरुद्ध अपशब्द प्रयोग गरेको आरोपमा आस्थाविरुद्ध प्रहरीले पक्राउ पुर्जी जारी गरेको थियो । सिक्किमबाट फर्केपछि साेमबार बिहान आफैँ प्रहरीकोमा पुगेकी उनलाई ४ दिन थुनामा राखेर अनुसन्धान गर्न जिल्ला प्रशासन कार्यालय, काठमाडौंले अनुमति दिएको छ । 

यसअघि काठमाडौं प्रहरी परिसर, टेकुले जिल्ला सरकारी वकिल कार्यालय, काठमाडौंमार्फत म्याद थपका लागि प्रशासनमा अनुरोध गरेको थियो । सोही अनुरोधका आधारमा जिप्रकाले उनलाई चार दिन थुनामा राख्न आदेश दिएको हो ।