काठमाडौं– सञ्चार तथा सूचना प्रविधिमन्त्री गोकुल बाँस्कोटाले सरकारले गाँजा खेतीलाई खुला गर्न नसक्ने बताएका छन् । सरकारका प्रवक्ता बिहीबार सरकारको नियमित पत्रकार सम्मेलनमा मन्त्री बाँस्कोटाले सोबारे बताएका हुन् । 

गाँजा खेतीलाई अहिलेसम्म नेपालको कानुनले मान्यता नदिएको भन्दै उनले गाँजा खेती मान्छे लठ्याउनलाई गर्ने हो वा औषधीय प्रयोगको लागि हो पहिले त्यो कुरामा स्पष्ट हुनुपर्ने बताए । 

गाँजा खेती गरेरै धनी हुने वा नहुने विषय आफूलाई जानकारी नभएको भन्दै उनले भने, ‘अहिलेसम्म गाँजालाई हामीले लागुऔषधकै रुपमा लिएका छौं।’ उनले पैसा आउँछ भन्नेबित्तिकै जे पनि गर्न नसकिने बताए । 

गत माघ ६ गते सत्तापक्षका विरोध खतिवडासहित ४२ सांसदले गाँजा खेतीलाई वैधानिक गर्न प्रतिनिधि सभामा जरुरी सार्वजनिक महत्वको प्रस्ताव पेस गरेका थिए ।