Tue, 26 May, 2020


अख्तियारलाई सर्वोच्चकाे प्रश्न : बाबुराम भट्टराई र माधव नेपाललाई किन मुद्दा नचलाएको ?
फरकधार / फागुन २, २०७६

काठमाडौं– ललितानिवासको जग्गा व्यक्तिको नाममा नामसारी गर्न भूमिका खेलेको भन्दै अख्तियार दुरुपयोग अनुसन्धान आयोगले एक सय ७५ जनालाई दोषी ठहर्याई कारबाहीे गरेको विषयमा सर्वोच्च अदालतले जवाफ माग गरेको छ ।



सर्वोच्चले सो प्रकरणमा पूर्वप्रधानमन्त्रीद्वय माधव नेपाल र बाबुराम भट्टराईमाथि मुद्दा नचलाउनुको कारण माग गरेको छ । शुक्रबार प्रधानन्यायाधीश चोलेन्द्रशमशेर जबराको इजलासले जवाफ माग गरेको हो । अदालतले सोबारे लिखित जवाफ पेस गर्न अख्तियारलाई १५ दिनको समय दिएको छ । 

बालुवाटार जग्गा प्रकरणमा माधव नेपाल र बाबुराम भट्टराईलाई पनि मुद्दा चलाउनुपर्ने माग गर्दै वरिष्ठ अधिवक्ता बालकृष्ण न्यौपानेले सर्वोच्चमा रिट दायर गरेका थिए । सोही रिटमा सुनुवाइ गर्दै सर्वोच्चले यस्तो आदेश गरेको हो ।

बालुवाटारको सरकारी जग्गा नक्कली मोही खडा गरी व्यक्तिको नाममा नामसारी गरेको विषयमा अख्तियारले चार मन्त्रीविरुद्ध मुद्दा चलाउने निर्णय गरेको थियो । मन्त्रिपरिषद्मा जग्गाबारे प्रस्ताव लगेका कारण उनीहरुमाथि मुद्दा लगाए पनि अख्तियारले पूर्वप्रधानमन्त्रीद्वय नेपाल र भट्टराईविरुद्ध मुद्दा दायर गरेको थिएन ।   

पूर्वप्रधानमन्त्रीद्वय नेपाल र भट्टराईले नीतिगत निर्णय गरेकाले उनीहरुमाथि मुद्दा चलाउन नसकेको तर्क गर्दै अख्तियार पन्छिएको थियो । अख्तियारले विशेष अदालतमा दायर गरेको अभियोगपत्रमा सरकार प्रमुखले गरेका नीतिगत निर्णयमा आफूले मुद्दा चलाउन सक्ने अधिकार नभएको उल्लेख गरेको थियो । 


फरकधारमा प्रकाशित कुनै समाचारमा तपाईंको गुनासो भए हामीलाई news@farakdhar.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक ट्विटरमा पनि जोडिन सक्नुहुन्छ ।


यस विषयसँग सम्बन्धित समाचार

यो सामाग्री सेयर गर्नुहोस्


यो पनि नछुटाउनुहोस्