एजेन्सी– भारतले बेलायतको लेबर पार्टीकी एक महिला सांसदलाई दिल्ली विमानस्थलमा नै रोकेको छ । उनको भिसा विमानस्थलमा नै रद्द गरिएपछि उनी बेलायत फर्किएकी छिन् । 

सांसद डेबी अब्राहम्स कश्मिरले पाएको विशेष राज्यको दर्जा हटाइएको विषयको विरोधमा थिइन् । भारतले अनुच्छेद ३७० हटाएपछि उनले भारत सरकारको आलोचना गर्दै आएकी थिइन् ।

डेबी अब्राहम्स कश्मिरमाथि छानबिन गर्न बनेको बेलायती संसदीय समितिकी अध्यक्ष पनि हुन् । उनले विमानस्थलमा अधिकारीहरुले आफ्नो भिसा किन रद्द गरियो भन्नेबारे नबताएको गुनासो पनि गरेकी छिन् ।

केहीअघि कश्मिरले विशेष राज्यको दर्जा पाउने भारतीय संविधानको अनुच्छेद ३७० हटाएपछि मोदी सरकारको विरोधमा बेलायती लिबरल पार्टीका सांसदले विरोध गरेका थिए ।

यहीबीच डेबी व्यक्तिगत रुपमा भारत घुम्न इमिरेट्स एयरलाइन्सबाट भारत आएकी थिइन् । तर, विमानस्थलमा इमिग्रेसन अधिकारीहरुले उनको भिजा खारेज गरिदिएका थिए ।

यसबारे प्रतिक्रिया दिँदै उनले भनेकी छिन्, ‘मसँग एउटा अपराधीमाथि गरिने व्यवहार जस्तै गरियो । मलाई विश्वास छ कि भारतले मलाई आफ्नो परिवार तथा साथीहरुलाई भेट्न दिनेछ ।’

गत वर्ष डेबीले भारतले कश्मिरका जनतासँग अभद्र व्यवहार गरेको संज्ञा दिँदै बेलायती विदेशमन्त्रीलाई चिठी लेखेकी थिइन् ।