काठमाडौं— सन्चार तथा सूचना प्रविधिमन्त्री गोकुल बाँस्कोटाले राजीनामा दिने भएका छन् । सेक्युरिटी प्रिन्टिङ प्रेसको खरिदमा घुसमा बार्गेनिङ गरेको अडियो सार्वजनिक भएपछि उनले राजीनामा दिने भएका हुन् । 

आज (बिहिबार) नै उनले दिउँसो राजीनामा दिने नेकपाका एक नेताले फरकधारलाई बताए । ती नेताका अनुसार अहिले सन्चारमन्त्री गोकुल बाँस्कोटा काठमाडौंबाहिर छन् । उनले काठमाडौं फर्किएलगत्तै राजीनामा दिनेबारे प्रधानमन्त्री केपी शर्मा ओलीलाई बताएका छन् ।

आज प्रधानमन्त्री केपी शर्मा ओलीसँग भएको उनको वार्तामा पनि उनलाई राजीनामा दिएर छानबिनमा सहयोग गर्न निर्देशन दिएको प्रधानमन्त्री ओलीको सचिवालयका एक सदस्यले बताए ।

तर, यस विषयमा बाँस्कोटासँग बुझ्न खोज्दा उनको मोबाइल अफ थियो । उनको सचिवालयका सदस्यहरुले पनि फोन अफ गरेका छन्, केहीले फोन उठाइरहेका छैनन् ।