काठमाडौं— प्रधानमन्त्री केपी शर्मा ओलीको मिर्गौला दोस्रोपटक प्रत्यारोपण गरिने भएको छ । प्रधानमन्त्रीका प्रेस सल्लाहकार सूर्य थापाका अनुसार उनको मिर्गौला प्रत्यारोपण त्रिवि शिक्षण अस्पतालमा हुने भएको हो ।

आइतबार प्रधानमन्त्री केपी शर्मा ओलीले डाकेको नेकपा सचिवालय बैठकमा यसबारे जानकारी दिएका थिए । बैठकले उनको स्वास्थ्यलाभको कामना गरेको छ । 

प्रधानमन्त्री ओलीको यो दोस्रोपटक मिर्गौला प्रत्यारोपण हो । यसअघि २०६३ सालमा भारतको अपोलो अस्पतालमा उनको मिर्गौला प्रत्यारोपण गरिएको थियो । 

त्यसयता उनले नियमित औषधि सेवन गरिरहेका छन् । 

सन् २०१३ मा मिर्गौलामा अलिक बढी समस्या देखिएपछि प्रधानमन्त्री केपी शर्मा ओलीलाई उपचारका लागि थाइल्यान्ड लगिएको थियो । त्यहाँ उनी एक महिनाभन्दा लामो समयसम्म उपचारका लागि बसेका थिए ।

गत १८ साउनमा पहिलो पटक उनी उपचारका लागि सिंगापुर गएका थिए । त्यहाँको अस्पतालमा उनको फेरेसिस प्लाज्माफेरोसिस गरिएको थियो । तर, यसले पनि उनको स्वास्थ्यमा उल्लेख्य सुधार ल्याएको थिएन ।

त्यसयता प्रधानमन्त्री केपी शर्मा ओलीले नियमित डायलाइसिस गर्दै आएका छन् ।

यसपटक मिर्गौला प्रत्यारोपणका लागि प्रधानमन्त्री केपी शर्मा ओली भारत, अमेरिका वा नेपालमै गर्ने भन्नेमा थिए । चिकित्सकहरुको परामर्शपछि ओलीले नेपालमा नै मिर्गौला प्रत्यारोपण गर्ने भएका हुन् । 

ओलीका लागि यसपटक उनकी नातिनीले मिर्गौला दिने भएकी छिन् । तर, यसबारे प्रधानमन्त्री कार्यालयले खुलस्त पारेको छैन ।