काठमाडौं– काेराेनाकाे सम्भावित जोखिमबारे उच्च सर्तकता अपनाउने विषयमा छलफल गर्न सरकारले सर्वदलीय बैठक आह्वान गर्ने भएको छ ।

मंगलबार बसेको कोरोना जोखिम रोकथाम उच्चस्तरीय समितिको बैठकले सर्वदलीय बैठक डाक्ने निर्णय गरेको हाे । अर्थमन्त्रीसमेत रहेका सरकारका प्रवक्ता एवं सञ्चार तथा सूचना प्रविधिमन्त्री डा. युवराज खतिवडाले जानकारी दिएका हुन् ।

सम्भावित जोखिमको अवस्थामा उच्च सतर्कता अपनाउन सबै राजनीतिक दलहरुको भूमिका महत्वपूर्ण रहने भन्दै बैठकको तयारी गरिएको डा. खतिवडाले बताए ।

बैठक कहिले बस्छ भन्ने मिति तय नभए पनि छिट्टै आह्वान गर्ने जानकारी गराउँदै खतिवडाले राजनीतिक समझदारीको सन्देश दिन पनि यस्तो बैठक अपरिहार्य रहेको बताए ।