एजेन्सी– अहिले दुनियाँमा कोरोना भाइरसका कारण सबैजसो कार्यक्रम रद्द भएका छन् । विभिन्न देशका सरकारले आफ्नो देशहरुमा मानिसहरुलाई भेटघाट नहुन अनुरोध गरेका छन् । 

तर, मेक्सिकोमा भने एउटा म्युजिकल फेस्टिभलका लागि हजारौँ मानिस एक ठाउँमा भेला भएका छन् । त्यसो त मेक्सिकोमा पनि कोरोना भाइरस संक्रमण देखिइसकेको छ । त्यहाँ ४१ जनाभन्दा बढीमा कोरोना भाइरस संक्रमण देखिएको स्वास्थ्यमन्त्रालयले जनाएको थियो ।

दुई दिन चल्ने यो सांगितिक कार्यक्रम शनिबार सुरु भएको थियो । अंग्रेजी वेबसाइट हलिउड रिपोर्टरका अनुसार आयोजकले यो फेस्टिभलका लागि ७० हजारभन्दा बढी टिकट बेचेको छ । हुन त आयोजकले कार्यक्रममा सहभागी हुनेहरुको स्वास्थ्य जाँच गरेको छ र केहीले यहाँ मास्क लगाएका छन् । तर, विश्वमा कोरोनाको संक्रमण फैलिएको यो अवस्थामा त्यति ठूलो कार्यक्रम गरेकाले यसको आलोचना पनि भएको छ ।

उता, मेक्सिकोमा सफाइमा विशेष ध्यान दिने भएकाले यो भाइरसको कुनै जोखिम नरहेको बताउनेहरु पनि कार्यक्रममा पुगेका छन् । कतिले चाहिँ आफूहरुले काटेको टिकटको रिफन्ड नपाइने भएकाले कार्यक्रममा जानु परेको बताएका छन् ।