एजेन्सी– चीनमा रहेका स्वास्थ्य अधिकारीहरुले जापानमा प्रयोग भइरहेको एउटा औषधि कोरोना भाइरस संक्रमितको उपचारका लागि लाभदायी र प्रभावकारी देखिएको बताएका छन् । 

द गार्जियनमा छापिएको एक रिपोर्टअनुसार झाङ जिनमिनले यसलाई प्रभावकारी भएको बताएका हुन् । झाङ चीनको विज्ञान तथा प्रविधि मन्त्रालयका एक अधिकारी हुन् । उनले फाभिपिराभिर नामको औषधि, जसलाई फुजिफिल्मले बनाएको हो, ले चीनको वुहान र सेन्झेन भन्ने ठाउँमा राम्रो प्रतिफल दिएको पनि बताएका छन् । उनले त्यहाँ ३ सय ४० बिरामीलाई यो परीक्षण गरिएको बताएका छन् ।

‘यो उपचारमा प्रभावकारी देखिएको छ,’ झाङले पत्रकार सम्मेलनमा भनेका छन् । 

यो औषधि दिएपछि त्यहाँका बिरामीहरु चार दिनमा नै ठिक हुन थालेको बताइएको छ । अनि यो औषधि दिएका बिरामीको फोक्सोमा पनि ९१ प्रतिशतले सुधार आएको ती चिनियाँ अधिकारीले बताएका छन् ।

फुजिफिल्म तोयामा केमिकलले यो औषधि सन् २०१४ मा बनाएको हो ।

उता, जापानमा पनि चिकित्सकहरुले यही औषधि प्रयोग गरेर कोरोना भाइरस संक्रमितको उपचार गर्न थालेका छन् । जापानी अधिकारीले चाहिँ कोरोना भाइरस संक्रमणको उच्चतम तहमा पुगेका बिरामीलाई यो ठिक नभएको पनि जानकारी दिएका छन् ।