काठमाडौं– प्रधानमन्त्री केपी शर्मा ओलीले शुक्रबार कोभिड १९ सार्क आपत्कालीन कोषमा नेपालले १० करोड रुपैयाँ सहयोग गर्ने बताएका थिए । देशवासीका नाममा गरेको सम्बोधनका क्रममा गरेको सो घोषणाको भारतीय प्रधानमन्त्री नरेन्द्र मोदीले स्वागत गरेका छन् ।

भारतीय प्रधानमन्त्री नरेन्द्र मोदीको पहलमा भएको सार्कका राष्ट्र तथा सरकार प्रमुखहरुको भिडियो कन्फरेसमा यो कोषको घोषणा गरिएको थियो ।

शनिबार ट्विट गर्दै मोदीले नेपालको कदमको स्वागत गर्दै भनेका छन्– ओलीजीको यो प्रतिबद्धताले कोरोनाको महामारीविरुद्ध सामूहिक लडाइँ लड्ने सार्क देशको समर्थनलाई दर्शाउँछ ।

यसअघि यही चैत २ गते सार्कका राष्ट्र तथा सरकार प्रमुखहरुबीच सामूहिक भिडियो वार्ताका क्रममा भारतीय प्रधानमन्त्री मोदीले आपत्कालीन कोष घोषणा गर्दै भारतले एक करोड अमेरिकी डलर जम्मा गरेको जानकारी दिएका थिए ।

सो रकम कोरोना भाइरसविरुद्धको लडाइँमा खर्च गरिनेछ । सार्क सदस्य राष्ट्रले यो कोषमा आफ्नो स्वेच्छाले रकम जम्मा गर्न सक्नेछन् । यो रकम सार्कका कुनै पनि देशले प्रयोग गर्न पाउनेछन् ।