काठमाडौं– सरकारले तोकेको हवाईभाडादरमा ३६ प्रतिशतसम्म छुट दिने वायुसेवा सञ्चालक संघले घोषणा गरेको छ ।

यसरी छुटको घोषण गर्ने एयरलाइन्सहरुले देशको विषम परिस्थितिलाई मध्यनजर गरी आन्तरिक उडानमा छुटको घोषणा गरेका हुन् । ट्रंक रुटमा उडान गर्ने बुद्ध एयर र यति एयरलाइन्सले सिमरा, भरतपुर र जनकपुरबाहेक उडानमा २० देखि ३६ प्रतिशतसम्म छुट दिने निर्णय गरेका छन् । 

सरकारको निर्णयानुसार अत्यावश्यक वस्तुहरूको सूचीमा रहेको आन्तरिक हवाईसेवाको भाडादर सरकारले तोकेको सिलिङभित्र रहेर सेवा दिँदै आएको र बढी भाडा नलिएको पनि संघले जनाएको छ ।

संघले जारी गरेको भाडादरअनुसार काठमाडौंबाट विराटनगर ५ हजार ५ सय, भैरहवा ४ हजार ९ सय, नेपालगन्ज ६ हजार ३ सय, भद्रपुर ६ हजार २ सय, धनगढी ७ हजार ९ सय, पोखरा ३ हजार ७ सय र राजविराज ४ हजार २ सय छ । सो अधिकतम भाडादर भएको र यो भाडादर चैत १० देखि २१ गतेसम्म लागू गरिएको संघले जनाएको छ ।