कोरोना भाइरसको संक्रमण रोकथामका लागि अहिले विश्वभर विभिन्न तरिकाहरु अपनाइएको छ । तर, भारतको उत्तर प्रदेशमा बरेली नामको जिल्लामा प्रशासनले जुन तरिका अपनाएको छ, त्यसलाई हेर्दा र थाहा पाउँदा जो पनि अचम्ममा पर्छन् ।

त्यहाँ जुन केमिकल प्रयोग गरेर बस तथा अन्य वाहन र सडकलाई स्यानिटाइज गरिन्छ, त्यही स्यानिटाइजर बाहिर आएका गरिब मानिसहरुलाई भेला गरेर एकै ठाउँमा राखेर स्यानिटाइज गरिएको छ । अहिले त्यो केमिकल शरीरमा परेकाहरु अस्पताल भर्ना भएका छन् । 

यो बरेलीको बस स्ट्यान्डमा गरिएको हो । त्यहाँका कर्मचारीले विभिन्न ठाउँबाट आएका मानिसहरु जम्मा गरेर एक साथ सडकमा बस्न लगाएर उनीहरुलाई पाइपबाट नै स्यानिटाइजर प्रयोग गरेर नुहाइदिएका हुन् । 

यो पानीमा सोडियम हाइपोक्लोराइड पनि प्रयोग गरिएको बताइएको छ । यसले घर तथा सडकको सफाइ गरिन्छ ।

यसको भिडियो अहिले भारतीय सन्चारमाध्यम र सामाजिक सन्जालमा निकै प्रयोग गर्न थालिएको छ । भिडियोमा त्यहाँका अधिकारीहरुले मानिसहरुलाई अनुहार छोपेर बस्न भनेका छन् । मानिसहरु निहुरिएर अनुहार ढाकेका छन् । अनि उनीहरुमाथि त्यो केमिकल छरिएको छ ।