एजेन्सी– कोरोनाभाइरसको उद्गम स्थल मानिएको चीनमा पछिल्लो समय कोरोना कहर निकै घटेको छ । पछिल्लो समय युरोप र अमेरिकामा ठूलो समस्याका रुपमा देखिएको कोरोनाभाइरस अब चीनमा निकै हदसम्म कन्ट्रोलमा आएको छ । 

पछिल्लो समाचारअनुसार अब चीनमा कोरोनाभाइरसका कारण कसैको पनि ज्यान गएको छैन । अनि सोमबार चीनमा कोरोनाभाइरस संक्रमित जम्मा ३२ जना भेटिएका छन् ।

चीनमा कोरोना भाइरस संक्रमितको संख्या अहिलेसम्म ८१ हजार ७४० पुगेको छ । त्यहाँ कोरोनाभाइरसका कारण ३३३१ जनाले ज्यान गुमाएका छन् । 

चीनको सबैभन्दा बढी प्रभावित हुबेई प्रान्तमा जनजीवन सामान्य हुन थालेको छ । त्यहाँ लगाइएका अधिकांश प्रतिबन्ध पनि फुकुवा गर्न थालिएका छन् ।

उता, दक्षिण कोरियामा पनि लगातार दोस्रो दिन कोरोनाभाइरस संक्रमितको संख्या निकै घटेको छ । सोमबार लगातार दोस्रो दिन दक्षिण कोरियामा कोरोनाभाइरस संक्रमित ५० भन्दा कम भेटिएका छन् । यीमध्ये १७ जना विदेशबाट दक्षिण कोरिया पुगेको जनाइएको छ ।