काठमाडौं– कोरोना संक्रमण फैलिन नदिनका लागि भारत सरकारले लकडाउनको अवधि तीन साता थप गरेको छ । 

जसअनुसार अब भारतमा ३ मेसम्म लकडाउन हुने भएको छ । भारतीय प्रधानमन्त्री नरेन्द्र मोदीले राष्ट्रिय टेलिभिजनबाट सम्बोधन गर्दै मे ३ सम्मका लागि लकडाउनको घोषणा गरेका हुन् ।

सम्बोधनका क्रममा मोदीले सबैले दिएको सुझाबअनुसार लकडाउन लम्ब्याइएको बताए । उनले पहिलेभन्दा बढी सतर्कता आवश्यक रहेको उल्लेख गर्दै भने, ‘लकडाउन पालनाका लागि कठोरता बढाइनेछ । २० अप्रिलसम्म लकडाउन कति पालना भइरहेको छ, यसको लागातार मूल्यांकन गरिनेछ ।’

२१ दिने लकडाउनका क्रममा भारतीय जनताले धेरै पीडा र कष्ट सहेको बताउँदै मोदीले उनीहरुप्रति उच्च सम्मान व्यक्त गरेका छन् । उनले भने, ‘जनताले लकडाउनका कारण धेरै कष्ट सहनुभएको छ । तपाईंहरुको त्यागप्रति उच्च सम्मान प्रकट गर्दछु । समयमै सजगता नअपनाइए स्थिति झन खराब हुने थियो ।’