काठमाडौं– अर्थ, सञ्चार तथा सूचना प्रविधिमन्त्री युवराज खतिवडा सनसिटी अपार्टमेन्ट नपुगेको भन्दै उनको सचिवालयले स्पष्टीकरण दिएको छ । 

सनसिटी अपार्टमेन्टमा चैत ८ गते आन्तरिक समिति गठनका लागि निर्वाचन भएको र त्यसमा निर्वाचित छोरा तिलक खतिवडालाई बधाई मन्त्री खतिवडा त्यहाँ पुगेको भन्दै सञ्चारमाध्यममा खबर छापिएको थियो ।

‘पछिल्ला समयमा उहाँले कुनै पनि सार्वजनिक कार्यक्रम तथा भेलाहरुमा समेत सहभागी हुनुभएको छैन,’ उक्र समाचारलाई खण्डन गर्दै अर्थमन्त्रीको सचिवालयले भनेको छ, ‘उहाँ निवास, सिंहदरबार र बालुवाटारमा मात्र काममा व्यस्त हुनुभएको छ ।’

मन्त्री खतिवडा आफैँमा मुटुको बिरामी भएकाले स्वास्थ्यका विषयमा निकै सजग रहेको भन्दै मन्त्री खतिवडाका प्रेस संयोजक यमप्रसाद पौडेलले निर्वाचित समितिलाई बधाई दिन गएको विषयमा कुनै सत्यता नरहेको बताएका छन् । 

खतिवडाका छोरा तिलक सनसिटीका आन्तरिक व्यवस्थापन समितिको सचिवमा निर्वाचित भएका थिए । सो पदमा निर्वाचित भएपछि उनी र मन्त्री खतिवडाबीच भेटघाट भए–नभएको बारे भने सचिवालय मौन छ ।