अमेरिकाको प्रान्त मिजुरीमा कोरोनाभाइरसको विषयलाई लिएर चिनियाँ सरकारविरुद्ध एउटा मुद्दा दायर गरिएको छ । यसलाई त्यहाँ नागरिक मुद्दाका रुपमा लिइएको छ । 

यो मुद्दा यस्तो समयमा लगाइएको छ जतिबेला अमेरिकाले बारम्बार कोरोनाभाइरस संक्रमण फैलाएको भन्दै चीनमाथि बारम्बार औंला उठाइरहेको छ ।

अमेरिकी राष्ट्रपति डोनाल्ड ट्रम्पले महामारीको सुरुवाती दिनमा चीनको यो भाइरसविरुद्धको अभियानका लागि प्रशंसा पनि गरेका थिए । तर, जब भाइरस अमेरिकामा पनि फैलिन थाल्यो र यसलाई विश्व महामारी घोषणा गरियो, त्यसपछि उनले पनि चिनियाँ सरकारको बारम्बार विरोध गर्दै आएका छन् । उनले यो भाइरसलाई लिएर चीनले ठूलो मूल्य चुकाउनु पर्ने पनि बताउँदै आएका छन् । 

अमेरिकामा यही वर्ष नोभेम्बरमा राष्ट्रपतीय निर्वाचन हुँदैछ । राजनीतिक विश्लेषकले चाहिँ मिजुरीमा दायर गरिएको यो मुद्दा ट्रम्पलाई ठूलो चुनौति हुने विश्लेषण गर्न थालेका छन् ।

‘अहिले अमेरिकीहरु अमेरिकी सरकारले आफ्ना कमजोरी लुकाउन चीनमाथि आरोप लगाएको र चीनविरुद्ध मुद्दा हालेर ध्यान डाइभर्ट गर्न खोजेको भन्ने सोच्न थालिसकेका छन्,’ शिकागो विश्वविद्यालयका कानुनका प्रोफेसर टम गिन्सबर्गले भनेका छन्, ‘तर, यसले डोनाल्ड ट्रम्पलाई नै असर गर्ने देखिन्छ ।’

त्यसो त अमेरिकामा मुद्दा चले पनि चिनियाँ सरकारलाई चाहिँ खासै केही हुँदैन । किनकि अमेरिकी अदालतका मुद्दामा विदेशी सरकार सुरक्षित हुन्छन् । तर, यसलाई अन्तर्राष्ट्रिय जगतले कसरी लिन्छ भन्ने चाहिँ महत्वपूर्ण हुन्छ ।