एजेन्सी– क्युबाले शनिबार दक्षिण अफ्रिकामा २ सय १६ जना स्वास्थ्यकर्मी पठाएको छ । उनीहरुलाई कोरोनाभाइरसविरुद्ध लड्न दक्षिण अफ्रिका पठाइएको हो ।
यतिमात्र होइन, क्युबाले पछिल्ला दिनमा २० मेडिकल टिमलाई विभिन्न देशमा पठाएको छ । त्यसैले उसको प्रशंसा विश्वभर गर्न थालिएको छ । कतिपयले यसलाई समाजवादी एकताको संज्ञा दिएका छन् त कतिपयले मेडिकल डिप्लोमेसीको संज्ञा दिएका छन् ।
वामपन्थी शासनव्यवस्था भएको क्युबाले क्यारिबियन देशहरुमा पनि १२ सय स्वास्थ्यकर्मी पठाइसकेको छ । कतिसम्म भने क्युबाबाट कोरोनाभाइरसविरुद्ध लड्न युरोपका देशहरुमा पनि स्वास्थ्यकर्मी पुगेका छन् ।
तर, अमेरिकी राष्ट्रपति डोनाल्ड ट्रम्पको प्रशासनले यसरी क्युबाबाट पठाइएका स्वास्थ्यकर्मीलाई स्वीकार नगर्न अनुरोध गरेका छन् ।
त्यसो त क्युबामा नै पनि कोरोनाभाइरसका संक्रमित भेटिएका छन् । क्युबामा कोरोनाभाइरस संक्रमणका १३३७ संक्रमित भेटिएको बताइएको छ । त्यहाँ कोभिड १९ का कारण ५१ जनाको मृत्यु भइसकेको छ ।
दक्षिण अफ्रिकाका स्वास्थ्यमन्त्री ज्वेली मखिजले भनेका छन्, ‘क्युबामा सबैभन्दा राम्रो पक्ष भनेको त्यहाँको सामुदायिक स्वास्थ्य सेवा हो ।’
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।