एजेन्सी– न्युजिल्यान्डले पछिल्लो समय गरिरहेको लकडाउनमा केही छुटहरु दिन थालेको छ । त्यहाँ अब कोरोनाभाइरस निर्मूल भएको पनि सरकारी पक्षले दाबी गर्न थालेको छ । तर, अहिलै नै ढुक्क हुन नमिल्ने अभिव्यक्ति पनि आइरहेका छन् ।

अब न्युजिल्यान्डमा तेस्रो स्तरको लकडाउन सुरु गरिएको छ । अब त्यहाँ मानिसहरुलाई घरमा नै बस्नु पर्ने छ तर उनीहरुले नजिकका आफन्तहरुलाई भेट्न चाहिँ पाउने छन् । उनीहरुले आइसोलेसनमा रहेका व्यक्तिहरुलाई सहयोग गर्न पनि पाउने भएका छन् ।

रेष्टुरेन्ट पनि अब न्युजिल्यान्डमा खुल्न थालेका छन् । तर, अधिकांश रेष्टुरेन्टलाई अनलाइन डेलिभरी मात्र गर्न सरकारले आग्रह गरेको छ । अब चाहिँ मानिसहरुले रेष्टुरेन्टमा गएर खाना प्याक गरेर पनि घर लैजान पाउने भएका छन् । 

न्युजिल्यान्डमा अब स्कुलहरु पनि खोल्न पाइने भएको छ । तर, सामाजिक दूरी चाहिँ कायम गर्नु पर्ने सरकारले नियम ल्याएको छ ।