अन्तर्राष्ट्रिय श्रमिक दिवसको अवसरमा भिडियो सन्देश सार्वजनिक गर्दै प्रधानमन्त्री केपी शर्मा ओलीले श्रमजीवी वर्ग परिवर्तनको संवाहक भएको धारणा राखेका छन् । उनले हिजोको सशस्त्र युद्धका कारण गाउँबाट सहर आएका र सहरबाट पलायन भएर विदेशमा जानु परेको विषयमा आफू दुखी भएकोसमेत बताएका छन् । उनले श्रमजीवी वर्ग समस्याको आफैं सामना गर्न सक्ने वर्ग रहेको पनि बताएका छन् ।

उनले सबै मजदूर तथा श्रमिकका समस्या तथा सबै आयामहरुमा आफ्नो ऐक्यबद्धता रहेको पनि बताएका छन् । 

श्रमिकहरुको विषयमा अभिव्यक्ति दिँदै प्रधानमन्त्री केपी शर्मा ओलीले अहिले कोरोनाभाइरसका कारण श्रमिक वर्ग अझ समस्यामा परेको बताएका छन् । 

प्रधानमन्त्रीले आफ्नो नेतृत्वमा सरकार गठन भएका यी दुई वर्षमा श्रमिकको वर्गमा धेरै उपलब्धि भएको बताएका छन् । ‘यी दुई वर्षमा प्रधानमन्त्री रोजगार कार्यक्रमदेखि बैंकमा पारिश्रमिक दिने कामसमेत भएको थियो,’ उनले भने, ‘अहिले कोरोनाभाइरसका कारण समस्या आएको छ र सरकारले यो महामारीविरुद्ध लड्ने प्रयास गरिरहेको छ ।’

उनले नेपालमा कोरोनाभाइरसका कारण कुनै मानवीय क्षति नहुनु गर्व गर्न लायक भएको पनि बताएका छन् । उनले यो वर्ष श्रमजीवीको न्यूनतम पारिश्रमिक पुनर्निधारण गर्नु पर्ने समय भए पनि कोरोनाभाइरसका कारण यसले मारमा पारेको उनले बताएका छन् । नेपालको जिडिपीको झन्डै ४ प्रतिशत यसका कारण असर परेको पनि उनले बताएका छन् ।

उनले यी सबै समस्या भए पनि यो सरकारले सबै स्रोत र साधनले भ्याएसम्मका प्रयास गर्ने बताएका छन् ।

प्रधानमन्त्री ओलीले यसपटकको सम्बोधनमा पनि मिडियामाथि आफ्नो आक्रोश पोख्न छुटाएका छैनन् । ‘आज नेपालका केही सञ्चार माध्यमहरु र सामाजिक सञ्जालहरुमा पनि स्थिरता, स्थायित्व र विकासका विरुद्ध देशलाई अस्थिरतातर्फ धकेल्ने प्रकृतिका प्रयासहरुको समाचार सम्प्रेषण र चर्चा भइरहेको देखिन्छ । एकातिर सम्पूर्ण नेपाली जनता र सिंगै विश्व कोरोना महामारीका विरुद्ध लडिरहेको अवस्था छ, अर्कातिर यही अप्ठ्यारो परिस्थितिलाई मौका छोपेर अस्थिरताका त्यस्ता प्रयासहरु गरिनु दुःखद् कुरा हो,’ प्रधानमन्त्री ओलीले सम्बोधनमा भनेका छन् । 

प्रधानमन्त्रीले थपेका छन्, ‘आफ्ना ससाना स्वार्थ वा कुनै गलत उद्देश्यका साथ कसैले यस परिस्थितिलाई बिथोल्न र बिगार्न खोज्छ भने सरकार, नेकपाका कार्यकर्ता र आम नेपाली जनतालाई यो किमार्थ स्वीकार्य हुँदैन । त्यस्ता प्रयासलाई सफल हुन दिइने छैन भन्नेमा म सबैलाई आश्वस्त पनि पार्न चाहन्छु ।’

उनले अब राहत सुविधाभन्दा पनि पहिलो लक्ष्य सबैलाई काम हुने बताएका छन् । काममा भएकाहरुलाई न्यूनतम पारिश्रमिक सुनिश्चित गरिने पनि उनले प्रतिबद्धता जनाएका छन् ।

उनले ट्रेड युनियन एकताको अनुपम उदाहरण भएको पनि बताएका छन् ।

‘आजको अप्ठ्यारो घडीमा मिलेर अघि बढ्नु पर्छ, युनियनजस्तै । हामीले आफ्ना आकांक्षाको आकाशतिर माथिमाथि मात्र होइन, जनता भएतिर तल पनि हेर्नुपर्छ, युनियनले भने जस्तै,’ ओलीले भनेका छन्, ‘कमीकमजोरी भए सच्याउनु पर्छ । तर, अराजक होइन- अनुशासित हुनुपर्छ । समयको ख्याल गर्नुपर्छ । आफैंलाई घात गर्ने होइन- इमान्दार बन्नुपर्छ, युनियनले भनेजस्तै ।’