एजेन्सी– चीनका राष्ट्रपति सी जिनपिङले मंगलबार सेनाका लागि एक आदेश जारी गर्दै युद्धका लागि तयार रहन आदेश दिएका छन् । 

जिनपिङको यो टिप्पणी लद्दाखमा भारत र चीनबीच करिब २० दिनदेखि जारी गतिरोधको पृष्ठभूमिमा आएको हो । जिनपिङले सेनालाई पूरा दृढताका साथ देशको सम्प्रभुताको रक्षा गर्न भनेको हिन्दुस्तान टाइम्सले लेखेको छ । 

जिनपिङले यो आदेश संसद सत्रको क्रममा पिपल्स लिबरेसन आर्मी (पिएलए) र पिपल्स आर्म्ड पुलिस फोर्सको प्रतिनिधिको बैठकमा भाग लिने बेला दिएका हुन् ।

जिनपिङले सीमामा तनाव बढिरहेको र थुप्रै देश मिलेर चीनलाई निशाना बनाउन तयारी गरिरहेकोले सेनाले खराब स्थितिका लागि तयार रहनुपर्ने बताएका छन् । जिनपिङ चिनियाँ कम्युनिष्ट पार्टी (सिपिसी)का महासचिव तथा २० लाख सैनिकका सेना प्रमुख हुन् ।