जनकपुरधाम– भारतबाट नेपाल आएर आइसोलेसनमा बसेका वेला मृत्यु भएका धनुषा हंसपुरका राजु सदाको मृत्युबारे अध्ययन गर्न प्रदेश २ सरकारले छानबिन समिति बनाएको छ ।

समितिको संयोजकमा प्रदेश स्वास्थ्य निर्देशनालयका निर्देशक हरिश्चन्द्र शाह छन् भने अस्पताल विकास तथा चिकित्सा सेवा महाशाखाका प्रमुख डा. नवलकिशोर झा र मुख्यमन्त्री तथा मन्त्रिपरिषद् कार्यालयका कानुन उपसचिव दिलीपकुमार प्रधान सदस्य छन् ।

समितिलाई ७ दिनभित्र प्रतिवेदन पेस गर्न समयावधि दिइएको छ । उपचार गर्दा वा सेवा प्रवाहमा लापरबाही भएको पाइए जिम्मेवार व्यक्तिलाई कारबाही गरिने जनाइएको छ ।

१७ दिनसम्म क्वारेन्टिनमै बसेपछि उनलाई झाडापखाला लाग्दा राम्रो उपचार नपाएर सोमबार उनको मृत्यु भएको थियो ।