काठमाडौं– प्रधानमन्त्री केपी शर्मा ओलीले आफूलाई प्रधानमन्त्रीबाट हटाउने खेल सुरु भएको भनेर आइतबार दिएको अभिव्यक्तिप्रति नेपाली कांग्रेसले कडा टिप्पणी गरेको छ । नेपाली कांग्रेसका प्रवक्ता विश्वप्रकाश शर्माले ट्विट गर्दै ‘भारतद्वारा अतिक्रमित भूमि समेटेर संसद्बाट पारित नक्सा प्रधानमन्त्री केपी शर्मा ओलीको शासकीय अयोग्यता ढाक्ने पछ्यौरी नभएको’ बताएका छन् । 

देशको नयाँ राजनीतिक नक्सा उनले दिएको व्यक्तिगत अटोग्राफ नभएको टिप्पणी गर्दै शर्माले लेखेका छन्, ‘पारित नक्सा न प्रमले दिएको व्यक्तिगत अटोग्राफ हो, न उहाँको शासकीय अयोग्यता ढाक्ने पछ्यौरी !’ 

प्रधानमन्त्रीले अतिक्रमित भूमि फिर्ता गराउने कूटनीतिक पहल नगरेर नयाँ नक्सालाई सत्ता रक्षाको कवच बनाउन खोजेको आरोप लगाउँदै शर्माले ओलीको प्रवृत्ति राजनीतक र कूटनीतिक नभएको बताएका छन् । 

सरकार कोरोनासँग जुध्न असफल भएपछि जनताले परिवर्तन खोज्दा सहयोद्धाहरुले पद जोगाइदिएको स्मरण गराउँदै कांग्रेस प्रवक्ता शर्माले पद जोगाउने सहयोद्धाहरुलाई धन्यवाद दिन प्रधानमन्त्री ओलीलाई सुझाब दिएका छन् ।

यस्तो छ शर्माको ट्विटः ​

पारित नक्सा न प्रमले दिएको ब्यक्तिगत अटोग्राफ हो,न उहाँको शासकीय अयोग्यता ढाक्ने पछ्यौरी !

सिंगो देश एकढिक्का उभिएर संसदबाट सर्वसम्मत पारित नक्साको जग्गा फिर्ता गराउने कुटनैतिक पहलको `च्याप्टर क्लोज´ गरेर त्यसलाई सत्ता रक्षाको कवच बनाउन खोज्ने प्रवृत्ति न राजनैतिक छ न कुटनैतिक !

— Bishwa Prakash शर्मा (@bishwaprakash77) June 29, 2020​​

भारतले हटाउन खोज्दैछ, @Pm_Nepal ले नै भनेपछि नेकपाले देशलाई प्रस्ट्याउन जरुरी छ-

१,प्रधानमन्त्री बनाउन र हटाउन नेकपासंग संसदमा रहेको बहुमतको संवैधानिक सार्वभौमिकता नेकपासंग छ कि छैन ?
२,छ भने त्यसको प्रयोग गर्ने या नगर्ने जिम्मेवार विवेक उपर नेकपाको स्वतन्त्र हक के सुरक्षीत छैन?

— Bishwa Prakash शर्मा (@bishwaprakash77) June 29, 2020