एजेन्सी– म्यानमारमा मुसलधारे वर्षापछि पहिरो जाँदा कम्तीमा ११६ जनाको मृत्यु भएको छ । कचिन राज्यको एक रत्न खानीमा बिहीबार बिहान पहिरो जाँदा कैयौँ मानिस पुरिएको अधिकारीहरूले बताएका छन् । 

पहिरोमा परी मृत्यु भएका ११६ वटा शव बरामद भएको र ५४ जना घाइते भएको बताइएको छ । म्यानमारको सूचना मन्त्रालयले मृतकको संख्या बढ्न सक्ने जानकारी दिएको छ ।  

मुसलधारे वर्षाका कारण थपको उद्धारकार्य जटिल भएको छ । म्यानमारका रत्न खानीहरूमा यसअघि पनि कैयौँपटक पहिरो तथा अन्य घातक दुर्घटना भएका थिए ।