काठमाडौं– अमेरिकाको अलाबामा केही युवाहरूले कोभिड–१९ पार्टी आयोजना गरेको त्यहाँका स्थानीय अधिकारीले बताएका छन् । कोरोना संक्रमित र संक्रमण नभएका दुवैथरीलाई बोलाइएको पार्टीमा जो पहिले कोरोना भाइरस संक्रमित हुन्छ, उसले पुरस्कार पाउने व्यवस्था गरिएको जनाइएको छ । 

पार्टीमा संक्रमितलाई उपस्थित गराएर जानाजान अरुलाई संक्रमण गराउने गरिएको शहरकी काउन्सिल सदस्य सोन्या म्याकिन्स्ट्रीले बताएको सिएनएनले उल्लेख गरेको​ छ । यस्ता कार्य रोक्न सबै उपाय अवलम्बन गरिने उनले प्रतिबद्धता जनाएकी छिन् । 

उक्त पार्टीमा सहभागीहरुमा डाक्टरद्वारा पहिलो कोरोनाभाइरसको संक्रमण पुष्टि भएसँगै टिकटबाट बिक्री भएको सबै पैसा पाउने सर्त राखिएको थियो ।

यस्ता किसिमका उच्छृङ्खल गतिविधिसहितका पार्टीहरूलाई रोक्ने काम गरिरहेको बताउँदै काउन्सिल सदस्य सोन्याले अनिवार्य मास्क लगाउनुपर्ने अध्यादेश पारित गरेको जानकारी गराइन् ।