यो साता आइतबारदेखि नै निरन्तर बढिरहेको नेपाल स्टक एक्सचेन्ज (नेप्से) परिसूचक बुधबार दोहोरो अंकले ओरालो लागेको छ । निरन्तर उकालो लागेको बजार हप्ताको चौथो दिन १० दशमलव १३ अंकले ओरालो लागेको हो ।
१० अंकले ओरालो लाग्दा नेप्से १३ सय २६ विन्दुमा पुगेर बन्द भएको छ । दिनभर घटबढ भईरहेको नेप्से बजारमा ट्रेडिङ र म्युचुअल फण्डबाहेकका सबै समूहको परिसूचक ओरालो लागेका छन् ।
शून्य दशमलव ७६ प्रतिशत घटेको बुधबारको सेयर बजारमा कारोबार रकम भने रू. १ अर्ब नाघेको छ । यस दिन १७९ ओटा कम्पनीको १९ हजार ५४१ पटकको व्यापारमा रू. १ अर्ब ७ करोड ८४ लाख ६२ हजार बराबरको २९ लाख ७७ हजार ७०६ कित्ता सेयर कारोबार भएको छ ।
बुधबारको बजारमा लगानीकर्ता नाफा बुक गर्नेतर्फ केन्द्रित भएको विश्लेषकको तर्क छ । । समग्र कारोबारलाई हेर्दा बजार घटेको नभई स्थिर रहेको विश्लेषकको भनाइ छ । असार मसान्तलगायत सामान्य कारणले बजारमा केही उतारचढाव देखिएको बताउँछन् बजारलाई नजिकबाट नियालिरहेकाहरु ।
ठूला कम्पनीहरुको कारोबार मापक सेन्सेटिभ इन्डेक्स पनि यो दिन २ दशमलव ६४ अंक घटेर २७९ दशमलव ९५ विन्दुमा झरेको छ । सेन्सेटिभ इन्डेक्स शून्य दशमलव ९३ प्रतिशत घटेको हो ।
बुधबारको कारोबारमा पनि नेपाल पुनर्बीमा कम्पनीले सर्वाधिक कारोबार गर्ने स्थान कायमै राखेको छ । यस दिन रू. २५ करोड ५७ लाख ९९ हजार बराबरको कारोबार भएको उक्त कम्पनीको सेयर मूल्य रू.२४ ले बढेको छ ।
१० अंकभन्दा बढीले घटेको बजारमा ६२ ओटा कम्पनीको सेयर मूल्य बढेको छ । यस दिन सबैभन्दा बढी सूर्योदय लघुवित्त वित्तीय संस्थाका सेयरधनीहरुले कमाएका छन् । बुधवार उक्त कम्पनीको सेयरमूल्य रू. ७२ ले बढेर १० प्रतिशतको सकारात्मक सर्किट लागेको छ ।
सबैभन्दा बढी गुमाउनेमा तारागाउँ रिजेन्सी होटलका सेयरधनी रहेका छन् । यस दिन उक्त कम्पनीको सेयर मूल्य सबैभन्दा बढी रू. १५ ले घटेको छ । बुधवारको कारोबारमा ९९ ओटा कम्पनीको सेयर मूल्य घटेको छ ।
कारोबारमा आएका १२ ओटा समूहमध्ये व्यापारिक समूहको १ दशमलव ७७ प्रतिशत र म्युचुअल फण्ड समूहको १ दशमलव शून्य ५ प्रतिशतले परिसूचक बढेको छ भने बाँकी समूहको घटेको छ ।
बैंकिङ समूहको शून्य दशमलव ९५ प्रतिशत, होटल समूहको २ दशमलव ७२ प्रतिशत, विकास बैंकको शून्य दशमलव ४१ प्रतिशत, जलविद्युत समूहको शून्य दशमलव ९ प्रतिशत, वित्त समूहको शून्य दशमलव २७ प्रतिशत, निर्जीवन बीमा समूहको शून्य दशमलव ४९ प्रतिशत, उत्पादन तथा प्रशोधन समूहको शून्य दशमलव ४९ प्रतिशत, अन्य समूहको शून्य दशमलव ३७ प्रतिशत, लघुवित्त समूहको शून्य दशमलव ४५ प्रतिशत र जीवन बीमा समूहको शून्य दशमलव ७५ प्रतिशत परिसूचक घटेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।