अष्ट्रेलियाको दोस्रो ठूलो सहर मेलबर्नमा कोरोनाभाइरस संक्रमित बढेपछि फेरि लकडाउन लगाइएको छ । यो त्यहाँ लगाइएको दोस्रो लकडाउन हो ।

त्यहाँको सरकारले नयाँ निर्देशन जारी गर्दै झन्डै ५० लाख मेलबर्नवासीलाई आफ्नो घरबाट बाहिर ननिस्किन अनुरोध गरेको छ । उनीहरुलाई अत्यावश्यक सेवाका लागि मात्र घरबाट बाहिर निस्किन भनिएको छ ।

स्थानीय प्रहरीले मेलबर्नलाई चारै नाकामा सिल गरिएको पनि जनाएको छ । त्यसो त भिक्टोरियाले मंगलबारमात्र दोस्रो राज्यसँग जोडिएको सीमालाई बन्द गरिदिएको थियो । भिक्टोरियाको राजधानी मेलबर्नमा चाहिँ अहिले पूर्ण रुपमा लकडाउन लगाइएको हो ।

मेलबर्नमा मंगलबार १ सय ९१ जना नयाँ कोरोनाभाइरस संक्रमित भेटिएका थिए । त्यस्तै, बुधबार त्यहाँ १ सय ३४ जनामा कोरोना संक्रमण देखिएको छ । योसँगै अष्ट्रेलियामा कोरोना संक्रमितको संख्या ९ हजार पुगेको छ ।