समाजवादी पार्टीकी सांसद सरिता गिरीको सांसद पद गुमेको छ । संघीय संसद सचिवालयले गिरीको पद गुमेको जानकारी निर्वाचन आयोगलाई दिएसँगै उनको पद औपचारिक रुपमै गुमेको हो । 

संसद सचिवालयका महासचिव भरतराज गौतमले गिरीलाई पदबाट हटाइएको र उक्त पद रिक्त भएको सूचना प्रकाशित गरेका हुन् ।

दलको ह्विप उल्लंघन गरेको आरोपमा गिरीलाई निष्काशन गरिएको जानकारी समाजवादी पार्टीले आयोगलाई दिएको थियो । 

सरकारले लिम्पियाधुरा समेटिएको नयाँ नक्सालाई संविधानको निशान छापमा समेट्न ल्याइएको संविधान संशोधनको पक्षमा मत हाल्न पार्टीले लगाएको ह्विप उनले उल्लंघन गरेकी थिइन् । त्यस्तै गिरीले विधेयकको विरोधमा संशोधनसमेत दर्ता गराएकी थिइन् ।