प्रधानमन्त्री केपी शर्मा ओलीले अयोध्याका विषयमा दिएको अभिव्यक्तिप्रति प्रमुख प्रतिपक्षी दल कांग्रेसले आपत्ति जनाएको छ । प्रवक्ता विश्वप्रकाश शर्माले विज्ञप्ति जारी गदै प्रधानमन्त्रीको अभिव्यक्तिप्रति सरकार र नेकपाको आधिकारिक धारणाको मागसमेत गरेका छन् ।
प्रधानमन्त्रीको अभिव्यक्ति नेपाल सरकार र नेकपाको मत होइन भने शासन गर्ने नैतिक र राजनैतिक आधार उनले गुमाएको प्रष्ट हुने कांग्रेसको तर्क छ ।
‘नक्सा अनुरुपको जमिनमा हक स्थापित गर्न गम्भीर कुटनीतिक पहलकदमी भन्दा अयोध्याबारे विवादास्पद मत व्यक्त गर्नुले अर्थ विषयको गम्भीरताप्रति प्रधानमन्त्री गम्भीर हुनुहुन्न भन्ने पुष्टि भएको छ नै अपरिपक्व टिप्पणीमार्फत उहाँले संवेदनशील बिषयमा असंवेदनशील ब्यवहार प्रस्तुत गर्नुभएको छ’ विज्ञप्तिमा उल्लेख छ, ‘प्रतिपक्षीदल नेपाली कांग्रेसका तर्फबाट प्रधानमन्त्रीका पछिल्ला अभिव्यक्ति र ब्यवहारप्रति गम्भीर विमति प्रकट गर्दै यसबारे सरकार र नेकपाको संस्थागत धारणा सार्वजनिक गर्न माग गर्दछु ।’
‘प्रधानमन्त्री पद देशको संस्कार, संविधान र संवेदनशीलताभन्दा पर ब्यक्तिगत सनकको कैदी बन्न मिल्दैन । अतः प्रधानमन्त्रीको सोच, शैली, अभिव्यक्ति र ब्यवहार सम्पूर्ण रुपले बदल्ने या प्रधानमन्त्री नै बदल्ने, उहाँकै दल नेकपाको बिषय हो’ विज्ञप्तिमा उल्लेख छ ।
देशको प्रधानमन्त्रीको अभिव्यक्ति नेपाल सरकारकै संस्थागत अभिव्यक्ति हो कि होइन ? अनि उहाँको दल नेकपा पार्टीको विश्वास बमोजिमको हो होइन ? भन्ने प्रश्नसमेत कांग्रेसको छ । यसका लागि संस्थागत प्रस्टीकरण अनिवार्य भएको कांग्रेसको धारणा छ ।
कोरोना महामारी तथा बाढी पहिरोले कयौ हताहती भएको समयमा देशको प्रधानमन्त्रीको दायित्व के हुन्छ भन्दै कांग्रेसले सरकारसँग प्रश्नसमेत गरेको छ । अहिलेको अवस्थामा समयको सदुपयोग गरेर युद्धस्तरमा तयारी नगर्ने भन्दै कांग्रेसले सरकारको आलोचनासमेत गरेको छ ।
सर्वसम्मतिले देशको नक्सा संदसबाट पारित भए पनि भूमिमा अधिकार स्थापितमा प्रधानमन्त्रीको कुटनीतिक पहल नपुगेको आरोपसमेत कांग्रेसले लगाएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।