काठमाडौं– पठाओका सहसंस्थापक फहिम सलेह न्युयोर्कको अपार्टमेन्टमा मृत फेला परेका छन् । ३३ वर्षीय सलेह उक्त अपार्टमेन्टमा एक वर्षअघि सरेका थिए । 

उनको मृत्यु कसरी भयो भन्नेबारे आधिकारिक जानकारी आएको छैन । हात, खुट्टा, टाउको काटिएको अवस्थामा मंगलबार उनको शव फेला परेको अन्तर्राष्ट्रिय सञ्चारमाध्यमले जनाएका छन् ।

सन् १९८६मा साउदी अरबमा जन्मेका उनी बंगलादेशी बुवाआमाका सन्तान हुन् । उनको परिवारै अमेरिका बसाइँ सरेको थियो ।

उनले अमेरिकामै कम्प्युटर इन्जिनियरिङ पढेका थिए । सन् २०१५ मा उनले दुईजना साथीहरुसँग मिलेर बंगलादेशमा राइड सेयरिङ कम्पनी पठाओ खोलेका थिए । 

पठाओले नेपालमा पनि सेवा सञ्चालन गरिरहेको छ । सो राइड सेयरिङ कम्पनी नेपालमा लोकप्रिय बन्दै गएको छ ।