काठमाडौं— शिक्षा, विज्ञान तथा प्रविधि मन्त्रालयले विदेश पढ्न जान चाहने विद्यार्थीका लागि अनलाइनबाटै वैदेशिक अध्ययन अनुमति पत्र (नो अब्जेक्सन लेटर) दिने भएको छ ।

अब आवेदन पनि अनलाइनबाटै दिन सकिने भएको छ । यसअघि मन्त्रालयको केशरमहलस्थित वैदेशिक अनुमति शाखामा पुगेर आवेदन दिनुपर्ने व्यवस्था थियो । 

सरकारले विदेश अध्ययन गर्न जाने विद्यार्थीलाई अनुमति दिने निर्णय गरेपछि मन्त्रालयले अनलाइन आवेदन दिने व्यवस्था गरेको हो ।

मन्त्रालयकी सहप्रवक्ता दिव्या दवाडीका अनुसार एनओसी लिन चाहने विद्यार्थीले मन्त्रालयको तोकेको वेबसाइटमार्फत आवेदन दिन सक्नेछन् । उनका अनुसार आवेदन स्वीकृत भए नभएको बारे पनि विद्यार्थीलाई अनलाइनबाटै जानकारी दिइनेछ ।

आवेदकलाई एनओसी लिने मिति इमेलमार्फत जानकारी गराइने र विद्यार्थीले तोकिएको बैंकमा दस्तुर जम्मा गर्नुपर्नेछ । अनुमति पत्र लिन भने विद्यार्थी शाखामा उपस्थित हुनुपर्नेछ ।