इरानका राष्ट्रपति हसन रुहानीले शनिबार इरानमा कोरोनाभाइरस संक्रमितको संख्या २ करोड ५० लाख भएको बताएका छन् । उनले थप ३ करोड ५० लाख इरानी संक्रमणको खतरामा रहेको पनि बताएका छन् । 

समाचार एजेन्सी रोयटर्सका अनुसार रुहानीले बताएको यो तथ्यांक त्यहाँको स्वास्थ्य मन्त्रालयको एक नयाँ रिपोर्टमा आधारित रहेको छ ।

यो तथ्यांक इरानले अहिलेसम्म दिएको कोरोनाभाइरस संक्रमितको संख्याको तुलनामा निकै धेरै हो । अहिलेको तथ्यांकअनुसार इरानमा २ लाख ६९ हजारलाई कोरोनाभाइरस संक्रमण भएको छ । 

मध्यपूर्वी देशमा इरान नै कोरोनभाइरसका कारण सबैभन्दा बढी प्रभावित देश हो ।

रुहानीले शनिबार गरेको सम्बोधनमा चाहिँ २ करोड ५० लाख मानिस कोरोना संक्रमित भएको र १४ हजारले कोभिड १९ का कारण ज्यान गुमाएको बताएका थिए ।