काठमाडौं– सरकारले आफ्ना माग पूरा नगरेको भन्दै निजी विद्यालयहरुले अनलाइन कक्षा सञ्चालन रोकेको केही दिनमै सरकारले अनलाइन कक्षालाई निरन्तरता दिन निजी विद्यालयहरुलाई आग्रह गरेको छ । शिक्षा, विज्ञान तथा प्रविधि मन्त्रालयले आइतबार विज्ञप्तिमार्फत यस्तो आग्रह गरेको हो ।
मन्त्रालयका प्रवक्ता दीपक शर्माद्वारा जारी विज्ञप्तिमा निजी लगानीका विद्यालयले स्थगन गरेका सिकाइ सहजीकरण कार्यलाई निरन्तरता दिन अनुरोध गरिएको छ । सरोकारवालासँग छलफल गरेर निजी लगानीका विद्यालयका माग सम्बोधन गर्न तयार रहेको मन्त्रालयले जनाएको छ ।
मौद्रिक नीतिले विद्यालय सञ्चालकको अधिकांश माग पूरा गरेको दाबी गर्दै मन्त्रालयले व्यवसायीले लिएको ऋणको सावाँ र ब्याज भुक्तानीको म्याद थप र कर्जा पुनर्संरचना तथा पुनर्तालिकीकरण गर्ने व्यवस्था गरेको स्मरण गराएको छ ।
निजी विद्यालयका दुई संस्था प्याब्सन र एनप्याब्सनले माग पूरा नभएको भन्दै १ साउनदेखि अनलाइन कक्षा ठप्प पार्ने र शिक्षक–कर्मचारीलाई बेतलबी बिदा दिने निर्णय गरेका थिए । यद्यपि, शिक्षक–कर्मचारीलाई बेतलबी बिदामा राख्ने निर्णय भने उनीहरूले आइतबार नै फिर्ता लिएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।