नेपाल टेलिकमले युटिलिटी पेमेन्ट सर्भिससहितको भुक्तानी सेवा (मोबाइल मनी) सञ्चालन गर्ने भएको छ । नेपाल राष्ट्र बैंकले टेलिकमलाई मोबाइल मनी सञ्चालन गर्न आशयपत्र दिएसँगै भुक्तानी सेवाप्रदायकका रूपमा काम गर्न बाटो खुलेको हो ।
नेपाल टेलिकमले राष्ट्रिय वाणिज्य बैंकको सहकार्यमा मोबाइल मनी सेवा सञ्चालनका लागि राष्ट्र बैंकमा निवेदन दिएको थियो । आशयपत्र पाएसँगै सेवा सञ्चालनका लागि आवश्यक प्रक्रिया अगाडि बढाइएको टेलिकमले जनाएको छ ।
भुक्तानी सेवा सञ्चालन गर्न बैंक र टेलिकमले संयुक्त कम्पनी स्थापनालगायत आवश्यक पूर्वाधार जुटाएर ६ महीनाभित्र अन्तिम स्वीकृतिका लागि राष्ट्र बैंकमा निवेदन दिनुपर्छ । आवश्यक अध्ययन गरी राष्ट्र बैंकले अन्तिम स्वीकृति दिएपछि मात्र सेवा सञ्चालन पाउने राष्ट्र बैंकको भनाइ छ ।
टेलिकमले सञ्चालन गर्न लागेको मोबाइल मनी सेवा एक प्रकारको वालेट हो । नेपाल टेलिकमअन्तर्गतको मोबाइल नम्बर र वाणिज्य बैंकमा रहेको खाता नम्बर रजिस्टर गरेर एप्समार्फत सेवाग्राहीले विभिन्न किसिमको भुक्तानी गर्न सक्नेछन् ।
यसमा रिचार्जको सुविधा पनि हुनेछ । टेलिकमका अनुसार एप्समार्फत सबै प्रकारको कारोबार गर्न सकिनेछ । यसको बैंक सेटलमेन्टमा भूमिकामा राष्ट्रिय वाणिज्य बैंक रहेको छ । टेलिकमले मोबाइल सेवा सञ्चालन गरेसँगै दूरदराजमा रहेका मानिसमा पनि डिजिटल कारोबारको पहुँच पुग्ने विश्वास गरिएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
