काठमाडौं– निजी विद्यालयमा कार्यरत शिक्षकहरूले वैशाख महिनायताको तलब सरकारले नै व्यहोर्नुपर्ने माग राख्दै विद्यालय सञ्चालकहरूलाई यसबारे निर्देशन दिन सरकारलाई आग्रह गरेका छन् । 

शिक्षकहरूको संगठन संस्थागत विद्यालय शिक्षक युनियन (इस्टु)ले बुधबार विज्ञप्तिमार्फत यस्तो माग राखेको हो । विज्ञप्तिमा युनियनले शिक्षक–कर्मचारीले सबै महिनाको तलब पाउनुपर्ने, शिक्षक–कर्मचारीलाई जागिरबाट निकाल्न नहुने र निकालिसकेकालाई पुनर्वहाली गर्नुपर्ने माग गरेको छ । 

यस्तै, सम्पूर्ण निजी लगानीमा सञ्चालित विद्यालयहरूलाई योगदानमा आधारित सामाजिक सुरक्षा कोषमा अनिवार्य सुचीकृत हुने बाध्यकारी व्यवस्था गर्नुपर्ने र संस्थागत विद्यालय अनुगमन वर्गीकरण तथा शुल्क निर्धारण समितिमा संस्थागत विद्यालय शिक्षक युनियनलाई अनिवार्य प्रतिनिधित्व गराउनु पर्ने उनीहरूको माग छ ।