कोरोनाभाइरस संक्रमणको आधारमा भारत अब तेस्रो सबैभन्दा बढी प्रभावित देश बनेको छ । भारतमा कोरोनाभाइरस संक्रमितको संख्या बढेर २० लाख पुगेसँगै भारत सबैभन्दा प्रभावित तेस्रो मुलुक बनेको हो ।

पछिल्लो २४ घन्टामा भारतमा ५८ हजारभन्दा धेरै कोरोनाभाइरस संक्रमित भेटिएका छन् । यसका साथै अब भारतमा २० लाख २१ हजार ४ सय ७ जनामा कोरोनाभाइरस संक्रमण देखिएको छ ।

पछिल्लो बीस दिनमा मात्रै भारतमा १० लाखभन्दा बढी कोरोनाभाइरस संक्रमित थपिएका हुन् । 

अब अमेरिका र ब्राजिलपछि सबैभन्दा धेरै कोरोनाभाइरस संक्रमित भारतमा पुगेका छन् । 

भारतमा कोभिड १९ का कारण ४० हजारभन्दा धेरैले ज्यान गुमाएका छन् । कोभिड १९ का कारण मृत्यु हुने मानिसको संख्याको आधारमा अब भारत पाँचौ सबैभन्दा बढी प्रभावित देश बनेको छ ।