पोखरा, कोरोना संक्रमणको जोखिम बढेको भन्दै कास्कीमा मंगलबार राति १२ बजेदेखि लागु हुने गरी निषेधाज्ञा जारी गरिएको छ। मंगलबार बिहान प्रमुख जिल्ला अधिकारीको संयोजकत्वको बसेको संकट व्यवस्थापन समितिको बैठकले  कास्की जिल्लाभर  ७ भदौसम्मका लागि निषेधाज्ञा गर्ने निर्णय गरेको  प्रशासन कार्यालय कास्कीले जनाएको छ ।

यसअघि पोखरा महानगरपालिकाले सोमबार  जिल्ला समक्ष निषेधाज्ञाको सिफारिस  गरेको थियो । पोखरा महानगरमा अत्यावश्यक पसल तथा व्यवसाय मात्रै खोल्न दिइने महानगरपालिकाले जानकारी दिएको छ ।  

गण्डकी प्रदेश सरकारले कोभिड रोकथामका लागि बनाएको संकट व्यवस्थापन समितिको पनि सोमबार बैठक बसेको थियो । बैठकले आवश्यकता हेरी आवत जावतमा कडाइ गर्न सक्ने निर्णय गरेको थियो । प्रदेशका सबै जिल्लामा बुधबारदेखि हिँडडुल र भीडभाड गर्न कडाइ गर्ने  निर्णय समितिले गरेको थियो ।