वीरगन्ज नाकाबाट गत आवमा ११ अर्ब ७२ करोड ८६ लाख ५२ हजार रुपैयाँ बराबरको १० करोड ७५ लाख ३५ हजार १७ लिटर खजुरको प्रशोधित तेल निकासी भएको छ । अघिल्लो आवमा ६ अर्ब ७० करोड ५९ लाख ९० हजार रुपैयाँ बराबरको ५ करोड ७५ लाख ७६ हजार ७ सय ६ लिटर खजुरको प्रशोधित तेल निकासी भएको थियो । 

वीरगन्ज भन्सार कार्यालयको तथ्यांक हेर्दा अघिल्लो आवभन्दा गत आवमा खजुर तेलको निकासी दोब्बरले बढेको छ । उच्च निकासी भएको खजुरको प्रशोधित तेल यो नाकाबाट निकासी वस्तुमध्ये अग्रस्थानमा परेको छ । 

यो नाकाबाट भटमासको प्रशोधित तेलको निकासी भने ५ गुनाले बढेको छ । गत आवमा यो नाकाबाट ८ अर्ब २४ करोड २७ लाख ८५ हजार रुपैयाँ बराबरको ६ करोड १५ लाख ५० हजार ९ सय ८३ लिटर भटमासको तेल निकासी भएको छ । अघिल्लो आवमा १ अर्ब ५९ करोड ८० लाख ६२ हजार रुपैयाँ बराबरको १ करोड २९ लाख ११ हजार ६ सय ९२ किलो भटमासको तेल निकासी भएको थियो । पर्सा बारा औद्योगिक करिडोरकै एक दर्जन उद्योगले यो तेल निकासी गर्छन् । 

सर्वाधिक निकासी भएका वस्तुमा भटमासको तेल तेस्रो नम्बरमा परेको छ । दुवै तेलको मुख्य बजार भारत हो । भारतले २ वर्षयता यी वस्तुको आयात आफ्नो मुलुकमा खुला गरेको छ । उसले आफ्नो बजारको माग आन्तरिक उत्पादनले धान्न नसक्ने अवस्था आएपछि मात्र नेपालबाट आयात खुला गर्ने गरेको छ । 

वीरगन्ज भन्सार कार्यालयका निमित्त प्रमुख गोपाल खत्रीले ब्राजिल, अर्जेन्टिना, युक्रेन, इन्डानेसिया लगायतका मुलुकबाट खजुरको कच्चा तेल आयात हुने गरेको बताए । आन्तरिक बजारका लागि खपत गर्न यसको आयात गर्दा मूल्यको १० प्रतिशत भन्सार शुल्क र १३ प्रतिशत मूल्य अभिवृद्धि कर लाग्ने गरेको उनले बताए । तर निकासी प्रयोजनका लागि आयात गर्दा भने बैंक ग्यारेन्टीमा यसको आयात गर्न सकिन्छ । यसरी आयात गर्दा यसमा भन्सार शुल्क लाग्दैन ।