नेपाली कांग्रेसका सभापति शेरबहादुर देउवाले नागरिकको स्वास्थ्यप्रति सरकार गैरजिम्मेवारभएको आरोप लगाएका छन् । देउवाले कोरोना भाइरस (कोभिड १९)को संक्रमण बढ्दै गइरहेको बेला पनि सरकार सरकार नागरिकको स्वास्थ्यप्रति संवेदनशील नभएको आरोप लगाएका हुन् । 

 ‘सरकार अत्यन्तै गैरजिम्मेवार भइरहेको छ । कोरोना रोकथाम र नियन्त्रणमा सरकारलाई कुनै मतलब छैन, कुनै चिन्ता देखिएको छैन,’ कांग्रेस कोभिड–१९ अनुगमन समितिले गरेको भर्चुअल छलफलमा देउवाले भने, ‘सरकार कोरोना संकटका बेलामा पनि भ्रष्टाचारमा लिप्त छ । मानवीय संवेदना देखिएन ।’

कांग्रेस कोभिड–१९ अनुगमन समितिले प्रदेश १ का पार्टीका अगुवा नेता–कार्यकर्ताका साथै जनप्रतिनिधिसँग गरेको भर्चअल संवादमा देउवाले यस्तो आरोप लगाएका हुन् ।

छलफलमा सभापति देउवाले भ्रष्टाचार गर्नुभन्दा अस्पताल निर्माणमा लाग्न सरकारलाई आग्रह गर्दै पिसिआर परीक्षण बढाउन आग्रह गरे ।

सभापति देउवाले पार्टीबाट निर्वाचित जनप्रतिनिधिलाई कोरोना संकटका बेलामा जनताको सेवामा काम गर्न निर्देशन दिए ।