चारवर्षे कार्यकाल पूरा गरेर कुलमान घिसिङ मंगलबार बिदा भएपछि सरकारले नेपाल विद्युत प्राधिकरणको नयाँ कार्यकारी निर्देशक छनोटका लागि खुला प्रतिस्पर्धा गराउने भएको छ ।

प्रधानमन्त्री केपी शर्मा ओलीनिकट एक नेताका अनुसार सरकारले कानुनअनुसार नयाँ कार्यकारी निर्देशक छनोट खुला प्रतिस्पर्धाबाटै गराउन लागेको हो ।

यसअघि प्रधानमन्त्रीका प्रेस सल्लाहकार सूर्य थापाले सामाजिक सञ्जालमार्फत यस्तो संकेत गरेका थिए । पार्टी प्रवक्ता नारायणकाजी श्रेष्ठले कुलमानलाई दोहोर्याउन माग गरेको विषयमा प्रतिक्रिया दिँदै  थापाले सरकार कानुनअनुसार अघि बढ्ने बताएका थिए ।

निवर्तमान सिइओ घिसिङले भने आफू खुला प्रतिस्पर्धामा नजाने जानकारी राजनीतिक नेतृत्वलाई गराइसकेका छन् । उनले एकपटक कार्यसम्पादन क्षमता देखाइसकेको अवस्थामा फेरि प्रतिस्पर्धामा जान नचाहेको उनीनिकट स्रोतले बताएको छ । 

घिसिङले जिम्मेवारी सम्हालेको पहिलो आर्थिक वर्षमा प्राधिकरणले १ अर्ब ४७ करोड, दोस्रो वर्षमा २ अर्ब ८५ करोड, तेस्रो वर्षमा ९ अर्ब ८१ करोड र चौथो वर्षमा ११ अर्ब ५ करोड रुपैयाँ नाफा कमाएको छ ।