मकवानपुरको बकैया गाउँपालिकाका इन्जिनियरको सवारी दुर्घटनामा मृत्यु भएको छ । कोरोना पुष्टि भएर हेटौँडाबाट होम आइसोलेसनमा बस्नका लागि चितवन जाँदै गर्दा दुर्घटनामा परी उनको बाटैमा मृत्यु भएको हो । 

शनिबार पूर्व–पश्चिम राजमार्गअन्तर्गत हेटौँडा उपमहानगरपालिकामा चितवन भरतपुर—७ का २९ वर्षीय दीपेन्द्र अधिकारीको मृत्यु भएको हो । मोटरसाइकलमा जाँदा कसैलाई नछोइने र घरमा सुरक्षित ढंगले बस्ने सोचका साथ उनी एक्लै मोटरसाइकलमा चितवनतर्फ लागेका थिए । 

ना४९प २४०० नम्बरको मोटरसाइकलमा हेटौँडाबाट चितवनतर्फ जाँदै गरेका उनलाई चितवनबाट हेटौँडातर्फ आउँदै गरेको बा३ख ९६६४ नम्बरको मिनी बसले ठक्कर दिएको थियो । उपचारका लागि हेटौँडा ल्याउँदै गर्दा उनको बाटैमा मृत्यु भएको जिल्ला प्रहरी कार्यालय मकवानपुरले जनाएको छ ।