सोमबारदेखि सुरु भएको नेप्सेको ओरालो यात्राले मंगलबार पनि निरन्तरता पाएको छ । अघिल्लो दिन सामान्य घटेको नेप्से परिसूचकमा मंगलबार दोहोरो अंकको गिरावट आएको छ । बजार खुलेदेखि नै घट्न सुरु गरेको परिसूचक अन्तमा २२ दशमलव ९१ अंकले घटेर १५४६.१५ मा पुगेको छ । 

दोहोरो अंकले घटेको बजारमा नेप्से परिसूचक १५५० अंक भन्दा तल पुगेको छ । बजारमा सबै समूहका परिसूचक ओरालो लाग्दा मंगलबार करिब २३ अंकको गिरावट आएको हो ।

बजारमा सबैभन्दा बढी निर्जीवन बीमा समूहको परिसूचक घटेको छ । सो समूहको परिसूचक ११२ अंकले घट्दा जीवन बीमा समूहको परिसूचक पनि १०९ अंकले ओरालो लागेको छ ।

यसैगरी बजारमा उच्च गिरावट आउने कम्पनीहरूमा जलविद्युत् समूहका कम्पनी रहेका छन् । अघिल्लो हप्ता बढेको जलविद्युत् कम्पनीको सेयर यस हप्ता सोही अनुरुप गिरावट आएको छ ।

यसैगरी बजारमा बढी प्रभुत्व रहेको बैंकिङ समूहको परिसूचकमा दोहोरो अंकको गिरावट आएको छ । मंगलबार सो समूहको परिसूचक २२ अंकले घट्दा विकास बैंक समूहको परिसूचक पनि ४० अंकले ओरालो लागेको छ ।

 यसैगरी बजारमा उत्पादनमूलक ३५, माइक्रोफाइनान्स २३, फाइनान्स समूह १२ अंकले घटेको छ । अघिल्लो हप्तासम्म बढिरहेको होटल समूहको परिसूचकमा पनि १५ अंकको गिरावट आएको छ ।

दिनभर बजारमा २ अर्ब ८१ करोड रुपैयाँको सेयर कारोबार भएको छ । १९९ कम्पनीको ७ लाख ५० हजार कित्ता सेयर खरिदबिक्री भएको छ । कारोबार रकमको आधार भने शिखर इन्स्योरेन्स कम्पनीको सबैभन्दा अगाडि छ । कम्पनीको ३१ करोड ९४ लाख रुपैयाँको सेयर खरिदबिक्री भएको छ ।