बजार अनुगमनका क्रममा वाणिज्य, आपूर्ति तथा उपभोक्ता हित संरक्षण विभागले बरामद गरेको प्याज खाद्य व्यवस्था तथा व्यापार कम्पनी लिमिटेडले बिक्री गर्ने भएको छ ।
विभागको बजार अनुगमन टोलीले हालै बल्खु र कालिमाटी तरकारी बजारमा लुकाएर राखेको करिब १२ सय किलो प्याज बरामद गरेको थियो । सोही प्याज खाद्य कम्पनीले बिक्री गर्ने भएको हो ।
काठमाडौं उपत्यकाका तरकारी बजारमा प्याजमा कालोबजारी भएको भन्दै बजार अनुगमन गर्दा उक्त स्थानमा लुकाएर राखिएको प्याज भेटेपछि प्रहरी प्रशासनको सहयोगमा बरामद गरी पसलका सञ्चालकलाई नियन्त्रणमा लिइएको थियो ।
बरामद गरिएको प्याज लामो समयसम्म राख्दा कुहिने सम्भावना धेरै भएपछि मंगलबार उद्योग मन्त्रालयले खाद्य कम्पनीलाई बिक्रीको जिम्मा दिने निर्णय गरेको थियो ।
व्यापारीले ५२ प्रतिकिलोका दरले प्याज किनेको भेटेपछि सोही मूल्यमा कम्पनीलाई बिक्रीको जिम्मा दिइएको विभागका सूचना अधिकारी रवीन्द्र आचार्यले जानकारी दिए ।
मन्त्रालयमा भएको निर्णयअनुसार नै व्यापारीले किनेको मूल्यमा नै कम्पनीलाई बिक्रीको जिम्मा दिइएको हो ।
मंगलबार अबेरमात्र मन्त्रालयले निर्णय गरेकाले कसरी बेच्नेबारे निर्णय गरी बिहीबारदेखि प्याज विक्री गरिने प्याज खाद्य व्यवस्था तथा व्यापार कम्पनीकी सूचना अधिकारी शर्मिला न्यौपानेले जानकारी दिइन् ।
प्रतिव्यक्ति ३ किलोका दरले थापाथलीस्थित खाद्य संस्थानको विक्री केन्द्रबाट विक्री गरिने उनले जानकारी दिइन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।