चीनले नेपाललाई पहिले साथी बनाएर अहिले नेपालको जमिन नै कब्जा गरेको प्रतिक्रिया भारतीय मिडियामा आउन थालेको छ । चीनले साथी बनाएको नेपाललाई पनि नछोडेको भारतीय मिडिया लाइभहिन्दुस्तानले लेखेको हो । 

‘साथीको नाटक गरेर चीनले नेपाललाई नजिक बनायो अनि नेपालकै जमिन कब्जा गरेर ११ भवन बनाएको छ,’ भारतीय मिडियामा आएको समाचारमा लेखिएको छ, ‘यसका कारण नेपाल सरकार अहिले समस्यामा परेको छ ।’

नेपाली मिडियामा आएको समाचारलाई उद्धृत गर्दै यो मिडियामा लेखिएको छ, चीनले सीमावर्ती जिल्ला हुम्लाको एक हिस्सामा ११ भवन बनाएको हो । यो क्षेत्रलाई नेपालले आफ्नो दाबी गर्दै आएको र यहाँको एक बोर्डर पिलर पनि गायब भएको भारतीय मिडियामा समाचार आउन थालेको छ ।

नाम्खा गाउँपालिकाका अध्यक्ष विष्णुबहादुर तामाङले यसबारे भनेका छन्, ‘चिनियाँ पक्षले भवन बनाएको यो क्षेत्रलाई आफ्नो दाबी गरेको छ । तर, यो नेपालको क्षेत्र हो ।’ आइतबार यो ठाउँमा हुम्ला जिल्लाका प्रमुख जिल्ला अधिकारी पनि पुगेको भारतीय मिडियाको दाबी छ ।