कर्णाली प्रदेशका मुख्यमन्त्री महेन्द्रबहादुर शाहीमाथि लागेको अविश्वासको प्रस्ताव आजै फिर्ता गराउने तयारी गरिएको छ । नेकपाकै बहुसंख्यक सांसदहरूले मुख्यमन्त्री शाहीविरुद्ध आइतबार अविश्वासको प्रस्ताव दर्ता गरेका थिए । 

उक्त विषयले भर्खरै समाधान भएको सत्तारुढ नेकपाको केन्द्रीय राजनीतिलाई नै असर पर्ने देखिएपछि नेकपाका अध्यक्षद्वय केपी शर्मा ओली र पुष्पकमल दाहाल प्रचण्ड आजै प्रस्ताव फिर्ता गर्न लगाउने गरी अहिले छलफलमा छन् । प्रधानमन्त्री केपी शर्मा ओलीको सरकारी निवास बालुवाटारमा दुई अध्यक्षबीच छलफल सुरु भएको छ । 

उक्त छलफलमा मुख्यमन्त्री शाहीविरुद्ध प्रदेशसभाका १८ जना नेकपा सांसदले संसदीय दलमा दर्ता गरेको अविश्वासको प्रस्ताव फिर्ता गराउनेबारे कुराकानी केन्द्रित रहेको स्रोतले जानकारी दियो । कर्णालीको बिवाद सुल्झाउन नेकपा अध्यक्ष प्रचण्डले सोमबार नै प्रधानमन्त्री ओलीलाई भेटेर आग्रह गरिसकेका छन् । 

प्रधानमन्त्री तथा अध्यक्ष ओलीनिकट नेताहरूले पनि यो बेला भनेको विवाद चर्काउने बेला नभएको भन्दै अविश्वासको प्रस्ताव फिर्ता लिन आग्रह गरिसकेका छन् । नेकपा संसदीय दलका उपनेता सुवासचन्द्र नेम्वाङले यसअघि टेलिफोन गर्दै अविश्वासको प्रस्ताव दर्ता गर्ने कार्यको अगुवाई गरेका नेकपा नेता तथा प्रदेश सांसद​ यमलाल कँडेललाई प्रस्ताव अगाडि नबढाउन भनिसकेका छन् । 

स्रोतका अनुसार आजै मुख्यमन्त्री शाहीमाथि लगाइएको अविश्वासको प्रस्ताव फिर्ता गराउने तयारी ओली–प्रचण्डको छ । यस विषयमा ओली–प्रचण्डबीच छलफलपश्चात् केन्द्रबाट कर्णालीलाई निर्देशन पठाउने तयारी रहेको छ । 

केन्द्रमा नेकपाका दुई अध्यक्षहरू अविश्वासको प्रस्ताव फिर्ता गराउने छलफल चलिरहँदा कर्णालीको राजधानी सुर्खेतमा गुलाबजंग शाहले संसदीय दलको बैठक शुरु गर्ने तयारी गरेका छन् । आज १ बजेका लागि बोलाइएको बैठक भने अहिलेसम्म शुरु हुन सकेको छैन । 

उक्त बैठकमा वरिष्ठ नेता माधव नेपाल पक्षका सांसद भने उपस्थित छैनन । अविश्वासको प्रस्तावबाट पछि हटेर बैठकमा सहभागी नभएको नेकपाका एक नेताले जानकारी दिए । 
नेकपा संसदीय दलको कार्यालय स्थलमा सहभागी एक पत्रकारले अहिलेसम्म १० जना मात्र सांसद आइपुगेको जानकारी दिए, जसमा कँडेल पक्षका ६ जना, पूर्व माओवादीका ३ जना र नेता नेपाल पक्षका एक जना सांसद सहभागी छन् । 

वरिष्ठ​ नेता नेपालले सोमबार मुख्यमन्त्री शाही सच्चिनुपर्ने र सांसदहरूले पनि अविश्वासको प्रस्ताव फिर्ता लिनुपर्ने भन्दै निर्देशन दिएका थिए । यही विषयमा छलफल गर्न अहिले सुर्खेतमा पनि अहिले दुवै पक्षका नेताहरू आन्तरिक छलफलमा समेत जुटेका छन् । 

नेता नेपालले सहजीकरण गर्न पठाएका केन्द्रीय सदस्य नीरज आचार्यले वार्ताको मध्यस्थ गरिरहेका छन् । अहिले केन्द्रीय सदस्य आचार्य, आर्थिक मामिला तथा योजनामन्त्री प्रकाश ज्वाला, ध्रुबकुमार शाही, पूर्वमाओवादीका तर्फबाट मुख्यमन्त्री शाही, सचिव मायाप्रसाद शर्मा, सांसद विन्दमान विष्टलगायत नेतासमेत छलफलमा छन् । 

दलको सचेतकमा शाही 

यसैबीच कर्णाली प्रदेशका मुख्यमन्त्री एवं नेकपा संसदीय दलका नेता महेन्द्रबहादुर शाहीले सांसद कुर्मराज शाहीलाई दलको सचेतक नियुक्त गरेका छन । प्रमुख सचेतक गुलावजंग शाहलाई हटाएर सीता नेपालीलाई प्रमुख सचेतक नियुक्त गरेपछि रिक्त स्थानमा शाहीलाई नियुक्त गरिएको हो ।

मुख्यमन्त्री शाहीका प्रेस सल्लाहकार ध्रुब बुढाथोकीले कालीकोटबाट निर्वाचित शाहीलाई मुख्यमन्त्री शाहीले सचेतक नियुक्त गरेको जानकारी दिए । आफूविरुद्ध अविश्वासको प्रस्ताव दर्ताका लागि हस्ताक्षर अभियान संकलन गरेको भन्दै शाहीले मुख्य सचेतक शाहलाई सोमबार प्रमुख सचेतकको जिम्मेवारीबाट मुक्त गरेका थिए ।

मुख्यमन्त्री शाहीसँग नेपाल समूहको गठबन्धन, तीन मन्त्रीको नाम बुझाइयो 

कर्णाली प्रदेशमा मुख्यमन्त्री महेन्द्रबहादुर शाहीसँग सहमति भएसँगै माधवकुमार नेपाल समूहले तीन मन्त्री र संसदीय दलको सचेतक पदका लागि सांसदको नाम बुझाएको छ । नेकपाका कार्यकारी अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल समूह त्यसलाई रोक्न सहमत भए । 

सुर्खेतमा मंगलबार भएको छलफलमा मुख्यमन्त्री शाही नेपाल समूहलाई तीन मन्त्री र संसदीय दलको सचेतक पद दिन तयार भएका छन । दुई पक्षबीच सहमति जुटेपछि अविश्वासको प्रस्तावमाथि मंगलबार राखिएको छलफलमा नेता नेपाल समूहका सांसदहरू अनुपस्थित रहे । 

एक नेताका अनुसार नेपाल समूहका नेता समावेश गरी मन्त्रिपरिषद् पनि मंगलबार नै पुनर्गठन गर्ने सहमति भएको छ । स्रोतका अनुसार नेपाल समूहले मन्त्रीका लागि चन्द्र शाही, करवीर शाही र अम्मरबहादुर थापाको नाम बुझाएको छ । 

संसदीय दलको सचेतकमा कर्मराज शाहीको नाम पठाइएको स्रोतले जनाएको छ । चन्द्र शाहीलाई मन्त्री बनाउन माधव नेपाल समूहले एक वर्ष अगाडि नै नाम बुझाएको थियो । तर, मुख्यमन्त्री शाहीले मन्त्री नियुक्त गरेका थिएनन् ।

अब मन्त्रिपरिषदमा नेता नेपाल पक्षका चार मन्त्री हुनेछन् भने पार्टी अध्यक्ष केपी शर्मा ओली समूहका दुई मन्त्री हुनेछन् । मन्त्रिपरिषद् पुनर्गठन गर्दा मुख्यमन्त्री शाहीले पूर्वमाओवादी समूहबाट समेत मन्त्री थप्ने तयारी गरेको बताइएको छ ।