पूर्वप्रधानमन्त्री तथा नेकपा अध्यक्ष पुष्पकमल दाहाल प्रचण्डको सचिवालयले कर्णाली प्रदेशमा देखिएको आन्तरिक विवादलाई ‘अराजनीतिक गतिविधि’को संज्ञा दिएको छ । सचिवालयमा रहेकी प्रचण्डपुत्री गंगा दाहालले अराजनीतिक गविविधि अन्ततः असफल भएको बताएकी हुन् ।
आइतबार कर्णाली प्रदेशसभाका १८ सदस्यले मुख्यमन्त्री महेन्द्रबहादुर शाहीविरुद्ध अविश्वासको प्रस्ताव दर्ता गरेका थिए । शाहीविरुद्ध अविश्वासको प्रस्ताव दर्ता भएपछि नेकपाको केन्द्रीय राजनीति नै तरंगित बनेको थियो ।
कर्णाली प्रदेशको राजनीतिबारे छलफलका लागि नेकपाका दुई अध्यक्षबीच सोमबार र मंगलबार भेटघाट भएको थियो । दुई अध्यक्षले मुख्यमन्त्री शाही र अविश्वास प्रस्तावका नेतृत्वकर्ता यमलाल कँडेललाई काठमाडौं बोलाएका छन् ।
अप्ठ्यारो फुकाउने क्रममा शाहीले माधव नेपाल समूहलाई तीन मन्त्री र एक सचेतक दिनेगरी सहमति गरेका छन् । त्यही सहमति नै उनको पद थमौतीका लागि बरदान साबित भयो ।
सो गतिविधिबारे प्रचण्डपुत्री दाहालले ट्विटरमार्फत कर्णाली प्रदेशको अराजनीतिक गतिविधि अन्त्य भएको भन्दै नेतृत्वले देखेको एकताको सपना साकार पार्न योगदान गर्ने सबैलाई बधाई ज्ञापन गरेकी छिन् ।
कर्णाली प्रदेशमा देखिएको एक अराजनीतिक गतिविधि अन्तत: असफल भएको छ। पार्टी एकताका लागि नेतृत्वले देखेको सपना साकार पार्न सकारात्मक भुमिका खेल्नुहुने सम्पुर्ण कमरेडहरुलाई बधाई छ✊✊
— ganga dahal (@gangadahal18) October 13, 2020
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।